ஈரானின் துறைமுகங்கள் மீதான அமெரிக்கக் கடற்படை முற்றுகை “ஒரு திறமையற்ற, அறியாமையான முடிவு” என உயர்மட்ட பேச்சுவார்த்தையாளர் முகமது பாகர் காலிபாஃப் கூறுகிறார்.
முக்கியமான கப்பல் போக்குவரத்துப் பாதை மீண்டும் திறக்கப்பட்ட 24 மணி நேரத்திற்கும் குறைவான நேரத்தில், ஹோர்முஸ் ஜலசந்தி மூடப்பட்டுள்ளதாகவும், அந்த நீர்வழிப்பாதை வழியாகச் செல்ல முயலும் எந்தக் கப்பலும் குறிவைக்கப்படும் என்றும் ஈரானின் இஸ்லாமியப் புரட்சிகரப் பாதுகாப்புப் படையின் (IRGC) கடற்படை தெரிவித்துள்ளது; இது ஒரு வியத்தகு நிலைமாற்றமாகும்.
ஈரானின் மாணவர் செய்தி நிறுவனம் வெளியிட்ட ஓர் அறிக்கையில், ஈரானியக் கப்பல்கள் மற்றும் துறைமுகங்கள் மீதான அமெரிக்கா, தன் கடற்படை முற்றுகையை நீக்கும்வரை ஜலசந்தி மூடப்பட்டிருக்கும் என்று IRGC கடற்படை சனிக்கிழமை கூறியது. ஈரானுக்கு எதிரான அமெரிக்க-இஸ்ரேல் போரில் நடைமுறையில் உள்ள போர்நிறுத்த ஒப்பந்தத்தை, அமெரிக்காவின் இந்த முற்றுகை மீறுவதாகவும் அது கூறியது.
“பாரசீக வளைகுடா மற்றும் ஓமான் கடலில் நங்கூரமிட்டுள்ள இடத்திலிருந்து எந்த விதமான கப்பலும் நகரக்கூடாது என்றும், ஹோர்முஸ் ஜலசந்தியை நெருங்குவது எதிரியுடன் ஒத்துழைப்பதாகக் கருதப்படும் என்றும், விதிமீறும் கப்பல் குறிவைக்கப்படும் என்றும் நாங்கள் எச்சரிக்கின்றோம்,” என்று அது கூறியது.
போரை முடிவுக்குக் கொண்டுவருவது தொடர்பாக வாஷிங்டனுக்கும் டெஹ்ரானுக்கும் இடையே நடைபெறும் பேச்சுவார்த்தைகளில் மூத்த பேச்சுவார்த்தையாளராகவும், ஈரானின் நாடாளுமன்ற அவைத் தலைவராகவும் உள்ள முகமது பாகர் காலிபாஃப், ஒரு தொலைக்காட்சி நேர்காணலில், “ஹோர்முஸ் ஜலசந்தி இஸ்லாமியக் குடியரசின் கட்டுப்பாட்டில் உள்ளது” என்று கூறியுள்ளார்.
“அமெரிக்கர்கள் பல நாட்களாக முற்றுகையை அறிவித்து வருகின்றனர். இது ஒரு திறமையற்ற, அறியாமையான முடிவு” என்றும் அவர் மேலும் கூறினார்.
இஸ்ரேலுக்கும் லெபனானுக்கும் இடையே 10 நாள் போர்நிறுத்தத்திற்கு இணங்க, ஈரான் தனது ஜலசந்தியைச் சுருக்கமாக மீண்டும் திறந்த சில மணிநேரங்களுக்குப் பிறகு, கட்டுப்பாட்டை மீண்டும் நிலைநாட்டும் இந்த நிகழ்வு நடந்தது. ”அந்த நீர்வழிப்பாதை அனைத்து வர்த்தகக் கப்பல்களுக்கும் முழுமையாகத் திறக்கப்பட்டுள்ளது” என்று ஈரானிய வெளியுறவு அமைச்சர் அப்பாஸ் அராக்சி வெள்ளிக்கிழமை கூறியதைத் தொடர்ந்து, உலகச் சந்தைகளில் எண்ணெய் விலைகள் சரிந்தன.
IRGC தனது முடிவைத் திரும்பப் பெறுவதற்கு முன்பு, பத்துக்கும் மேற்பட்ட வர்த்தகக் கப்பல்கள் அந்த நீர்வழிப்பாதை வழியாகச் சென்றன.
சனிக்கிழமையன்று இரண்டு வர்த்தகக் கப்பல்கள் மீது ஈரானியப் போர்க்கப்பல்கள் துப்பாக்கிச் சூடு நடத்தியதாக ஐக்கிய இராச்சிய கடல்சார் வர்த்தக நடவடிக்கைகள் (UKMTO) தெரிவித்துள்ளது. அந்த நீர்வழிப்பாதையில் நடந்த ஒரு ’துப்பாக்கிச் சூடு நிகழ்வில்’ இந்தியக் கொடி ஏந்திய இரண்டு கப்பல்கள் உட்பட்டதாக இந்திய வெளியுறவு அமைச்சகமும் கூறியுள்ளது.
அப்பகுதியில் உள்ள சில வர்த்தகக் கப்பல்களுக்கு, ஹோர்முஸ் நீர்வழிப்பாதை வழியாக ‘எந்தக் கப்பலும் அனுமதிக்கப்படாது’ என்று எச்சரிக்கும் IRGC கடற்படையிடமிருந்து வானொலிச் செய்திகள் வந்தன.
”நீர்வழிப்பாதையை மூடுவதன் மூலம் டெஹ்ரான், வாஷிங்டனை மிரட்ட முடியாது” என்று அமெரிக்க அதிபர் டொனால்ட் டிரம்ப் கூறினார். மேலும், புதன்கிழமை போர்நிறுத்தம் முடிவடைவதற்குள் ஓர் உடன்பாடு எட்டப்படாவிட்டால், அதை முடிவுக்குக் கொண்டுவரப்போவதாகவும் அவர் எச்சரித்தார். “கடற்படை முற்றுகை முழு வீச்சில் தொடரும்” என்றும் டிரம்ப் மேலும் கூறினார்.
இதற்கிடையில், ஈரானிய உச்ச தலைவர் மொஜ்தபா கமேனி, தனது எதிரிகளுக்கு “புதிய கசப்பான தோல்விகளை ஏற்படுத்த ஈரானின் கடற்படை தயாராக இருப்பதாக”க் கூறினார்.
‘இரண்டு போட்டித் தடைகள்’
ஈரானும் அமெரிக்காவும் முந்தைய நாள் இருந்த நிலைக்குத் திரும்பிவிட்டன என்று அல் ஜஸீரா செய்தியாளர் ஸெய்ன் பஸ்ராவி கூறினார்.
“24 மணி நேரத்திற்கும் குறைவான நேரத்திற்கு முன்பு, உலகத் தலைவர்கள் இந்த மோதலில் ஒரு திருப்புமுனை ஏற்பட்டதாகக் கருதி அதைப் பாராட்டினர். ஹோர்முஸ் ஜலசந்தியைத் திறப்பதன் மூலம் ஈரான் நம்பிக்கையை வளர்க்கும் ஒரு நடவடிக்கையை சமிக்ஞை செய்கிறது என்றும், அது போர்நிறுத்த ஒப்பந்தத்திற்கும் போருக்கு நிரந்தர முடிவுக்கும் வழிவகுக்கும் என்றும் அவர்கள் நம்பினர்” என்று அவர் கூறினார்.
“மக்கள் எவ்வளவு ஏமாற்றமடைந்திருந்தாலும், இது முற்றிலும் ஆச்சரியமானதல்ல. நாம் இப்போது காண்பதென்பது மீண்டும் முதல் நிலைக்கே திரும்புவதாகும்” என்று அவர் மேலும் கூறினார். தற்போது “இரண்டு போட்டித் தடைகள் நடைமுறையில் உள்ளன” என்றும் அவர் குறிப்பிட்டார்.
டெஹ்ரானில் இருந்து செய்தி வழங்கும் அல் ஜஸீராவின் அலி ஹாஷிம், ”ஒரு செய்தியைத் தெரியப்படுத்துவதற்காக ஈரான் இந்த ஜலசந்தியைப் பயன்படுத்துகின்றது” என்று கூறினார்.
“என்ன பேச்சுவார்த்தை நடைபெற உள்ளது என்பதில் ஈரானுக்கு நிச்சயமற்ற ஒரு சூழலை அது எதிர்கொண்டுள்ளது என்பது தெளிவாகிறது. எனவே, அது ஒரு எதிர்மறையான ஈடுபாடாக இருந்தாலும் கூட, பேச்சுவார்த்தைக்கான ஒரே இடமாக ஹோர்முஸ் ஜலசந்தி மீண்டும் உருவெடுத்துள்ளது. மேலும், அந்த இடத்தின் வழியாகத்தான் அவர்கள் அமெரிக்கர்களுக்குச் செய்திகளை அனுப்பி, தங்கள் செல்வாக்கைக் காட்டுகிறார்கள்,” என்று அவர் கூறினார்.
