உத்தரகாண்ட் (17 நவம்பர் 2025): உத்தரகாண்ட் மாநிலத்தில் உள்ள நைனித்தால் (Nainital) மாவட்டத்தில் உள்ள பிரபல நகரம் ஹல்த்வானி (Haldwani). பாஜக ஆளும் இப்பகுதியில், கோயிலும் பள்ளிவாசலும் அருகருகே உள்ளன. கடந்த நவம்பர் 16, 2025 அன்று, பள்ளிவாசலின் நுழைவாயிலில் பசுக் கன்றின் துண்டிக்கப்பட்ட தலை ஒன்று கிடந்தது. அதனைத் தொடர்ந்து, அப்பகுதியில் பெரும் மதக்கலவரம் ஏற்பட்டது.
இதனால், அப்பகுதியில் “பசு பாதுகாவலர்” என்ற பெயரில் விபின் பாண்டே எனும் பாஜக நிர்வாகியின் தலைமையில் ஒன்று திரண்ட பாஜக-வினர், பெரும் கலவரத்தில் ஈடுபட்டனர். மாட்டுக் கன்றை கொன்று தலையை போட்டது முஸ்லிம்கள்தான் என வாட்ஸ் அப் உள்ளிட்ட பல்வேறு சமூக ஊடகங்களில் வதந்தி தொடர்ந்து பரப்பப் பட்டது. இதனால் திரண்ட சங் பரிவாரங்களால், அப்பகுதியில் உள்ள முஸ்லிம்களின் கடைகள் மற்றும் பல்வேறு சொத்துக்கள் குறிவைத்து உடைத்து எரிக்கப்பட்டு வன்முறைக்கு உள்ளாக்கப் பட்டன.
பாஜக-வினர் நடத்திய மதக் கலவரம் பெருகுவதைக் கட்டுப்படுத்த, ஹல்த்வானி நகரில் பெருமளவு காவல்துறையினர் குவிக்கப்பட்டு, பாதுகாப்பில் ஈடுபடுத்தப் பட்டனர். ‘சதி செய்த முகம் தெரியாத குற்றவாளிகள்’ என எஃப்ஐஆரில் குறிப்பிடப்பட்டது. (நன்றி: சத்தியமார்க்கம்.காம்)
காவல்துறையினர் தொடர் விசாரணையில் ஈடுபட்டனர். அப்பகுதியில் உள்ள அனைத்து சிசிடிவி காட்சிகளையும் ஆய்வுக்கு உள்ளாக்கியபோது, தெருநாய் ஒன்று அருகில் உள்ள காட்டுப் பகுதியில் இருந்து, பிறந்த கன்றின் எச்சங்களை இழுத்து கொண்டு அப்பகுதிக்கு வந்தது கண்டறியப்பட்டது.
காட்டுப் பகுதியில் ஒரு பசுமாடு பிரசவித்துள்ள நிலையில், பிறந்த கன்றை பல்வேறு நாய்கள் தாக்கியதில் எஞ்சிய எச்சங்களை காட்டில் இருந்து தெருப்பகுதிக்கு நாய் இழுத்து வந்துள்ளது என துவக்க விசாரணையில் தெரியவந்துள்ளது. கன்றின் எச்சங்கள் நீதிமருத்துவ ஆய்வுக்காக எடுத்துச் செல்லப்பட்டுள்ளதாக காவல்துறை தெரிவித்தது. இதனால், மாட்டை வைத்து மதக்கலவரம் ஏற்படுத்த பாஜக-வினர் பரப்பிய வதந்தி முடிவுக்கு வந்தது.
குற்றப்பிரிவு காவல் கண்காணிப்பாளர் ஜகதீஷ் சந்திரா ‘இந்தியன் எக்ஸ்ப்ரஸ்’-க்கு தெரிவித்ததாவது:
ஞாயிறு இரவு, BNSS பிரிவு 172 இன் கீழ், ஏழு பேர் முன்னெச்சரிக்கை காவலில் வைக்கப்பட்டுள்ளனர்.
மதக் கலவரம் ஏற்படுத்து நோக்கில் “ஹிந்து சனாதனிகளே ஒன்றுபடுங்கள்; இன்றிரவு நாம் யாரும் தூங்கக் கூடாது!” என்று பாஜக நிர்வாகி விபின் பாண்டே எழுதி அனுப்பிய சுற்றறிக்கையை காவல்துறை கைப்பற்றி எஃப் ஐ ஆரில் இணைத்துள்ளனர். பாஜக நிர்வாகியான பாண்டேவைக் காவல்துறையினர் கைது செய்து, பின் நவம்பர் 23, 2025 அன்று பெயிலில் விடுவித்துள்ளனர். மதக் கலவரம் செய்ததாக இவர்மீது பல்வேறு வழக்குகள் நிலுவையில் உள்ளன.
சங் பரிவாரங்களின் தலைவரான யதின் பாண்டே ” இந்துக்களே விழித்துக் கொள்ளுங்கள். அவர்கள் புனிதமான கன்றைக் கொன்றாலும், நகரத்தை எரித்தாலும் இந்துக்கள் அமைதியாக இருக்க வேண்டுமா?” என்று எழுதி பரப்பிய கடிதங்களும் கைப்பற்றப் பட்டுள்ளன.
“முஸ்லிம்களின் சொத்துக்களை சேதப்படுத்திய வன்முறையாளர்களை அடையாளம் காணும் பணி நடைபெறுகிறது; அவர்களை விரைவில் கைது செய்வோம். காட்டுப் பகுதியில் பிரசவித்த பசுக் கன்றின் எச்சங்களின் மூலத்தை கண்டறியும் விசாரணையும் நடந்து வருகிறது. கன்றின் தலையை பள்ளிவாசல் முன் போடப்பட்டதா என்ற கோணத்திலும் ஆராய்ந்து வருகிறோம்” என்றார்.
திட்டமிட்ட மதக்கலவரம் மற்றும் வன்முறை தொடர்பான எஃப்ஐஆர் BNS பிரிவு 115(2)/125/191(1)/191(2)/324(4)/351(2) ஆகியவற்றின் கீழ் பதிவு செய்யப்பட்டுள்ளது. சத்தியமார்க்கம்.காம் திரட்டிய எஃப்ஐஆர்-இல் கீழ்க்கண்ட விபரங்கள் பதிவு செய்யப்பட்டுள்ளன:
1. மாட்டுக் கன்றை கொன்றது முஸ்லிம்கள் எனத் திட்டமிட்டு வதந்தி பரப்பிய சில “சமூக விரோதிகள்”, பின்பு வன்முறையாளர்களைத் திரட்டி, ஹல்த்வானி நகரின் பல பகுதிகளில் மதக் கலவரம் செய்து அமைதியை குலைக்கும் விதமாக கல்லெறிதல், கடைகள் மற்றும் சாலையில் நிறுத்தப்பட்ட வாகனங்களை சேதப்படுத்தல் மற்றும் வழிப்போக்கர்களை தாக்குதல் போன்றவற்றை செய்தது நிரூபணம் ஆகியுள்ளது.
2. சுமார் 40 முதல் 50 பேர் சேர்ந்து செயல்பட்டு, பரேலி சாலையில் உள்ள அமீர் ஹம்ஜா என்பவரின் ஷமா ரெஸ்டாரண்ட் மற்றும் அருகிலுள்ள முஸ்லிம்களின் உணவகங்களையும், பிற கடைகளையும், சாலையில் நிறுத்தப்பட்ட வாகனங்களையும் சேதப்படுத்தினர். மேலும், ஹல்த்வானி நகரின் பீலி கோதி பகுதியில் உள்ள கடைகளில் கல்லெறிந்தனர். உள்ளூர் டெம்போ டிரைவரையும் பிறரையும் தாக்கினர். அப்பகுதி முஸ்லிம்களின் உயிருக்கு மிரட்டல் விடுத்து, நகரின் சூழ்நிலையை பதட்டத்தில் வைத்துள்ளனர்.
என எஃப்ஐஆர்-ல் கூறப்பட்டுள்ளது.
(சத்தியமார்க்கம்.காம்)
